مدونة المدير

طيب أنا مش فاهم هو ليه الحكومة عملت علاوة مايو الـ 30% دى!!  يعنى من غير زعل كدة هل موظفين الحكومة اللى متوسط إنتاجيتهم الفعلية  فى يوم العمل تقل عن 30 دقيقة يستاهلوا علاوة أو زيادة المرتب؟؟!!! طيب أنا أعرف أنه لما أى وظيفة بيزيد إقبال الناس عليها بيقل مرتبها … و إحنا عارفين فى كام مليون واحد فى مصر مستعد يشتغل موظف حكومة حتى لو بـ 80 جنيه فى الشهر يبقى ليه نزود المرتبات؟؟؟ من الآخر كدة إذا كان موظف الحكومة اللى مش بينتج و بيرتشى (مش كل الموظفين طبعا) مش عاجبه مرتبه ما يسيب الحكومة و يدور على شغل فى القطاع الخاص بأضعاف مرتبه فى الحكومة بس معلش لازم هيدوس على نفسه شوية و يشتغل 8 ساعات بجد!!

الغريبة إن الناس زعلانة كمان من الحكومة علشان رفعت أسعار البنزين و السولار و تراخيص العربيات إلخ لتوفير العلاوة … كأن الناس دى جاية من كوكولاند مش عايشة معانا فى مصر!!  يعنى ما كللنا عارفين إن الحكومة مفلسة و مديونة و مسروقة .. طب كانت هتجيب منيين الـ 11 مليار بتوع العلاوة ؟!!  

طيب و الحكومة طلبت من القطاع الخاص زيادة المرتبات للموظفين… طيب الأسعار زادت يعنى تكاليف التشغيل زادت و مع ظروف البلد زيادة المبيعات و التوسع لأغلب المشاريع أمر صعب جدا لناس كتير … طيب نزود المرتبات إزاى؟؟! فى حين إن الناس دى هى اللى بتشتغل و تتعب بجد! و مع ذلك أضطررت أنا مثلا لزيادة المرتبات بنسب تتفاوت ما بين 10% لـ 15% خصما من أرباحى تعاطفا مع حال الموظفين.

الخلاصة إن موظفين القطاع العام زادوا 30% و أصحاب الأعمال الصغيرة و موظفى القطاع الخاص دفعوا الفاتورة …

إقرأ أيضا: مواطنون ضد الغلاء تطالب الرئيس مبارك بإلغاء العلاوة لأن الحكومة فرغتها من محتواها 

كالعادة فى شهر يناير بعد إنهاء حسابات العام السابق أصاب بإحباط من نسبة الربح الصافى مقارنة بمجموع الدخل… و كالعادة زى كل سنة آخذ القرار الثورة برفع الأسعار من 10% لـ 30% على الخدمات التى أقدمها… و كالعادة أيضا زى كل سنة أكتشف بعد عدة أيام إن مش أنا بس اللى عملت كدة!! كل حاجة زاد سعرها فجأة و بدون مبرر اليومين اللى فاتو (حد يقوللى مثلا ليه رول أكياس الزبالة زاد سعره من 7 إلى 9 جنيه!)

يعنى النتيجة كالعاده برضة إننى مش هاحس آخر السنة بزيادة فى الربح لأن زيادة المصاريف هاتاكل زيادة الأسعار بتاعتى!!

زيادة الأسعار دى بقت فيلم بايخ و الناس كلها إتعودت عليه خلاص. الحمد لله أنى أستطيع مواجهة زيادة الأسعار بزيادة أسعارى .. ربنا يكون فى عون الموظفين و خصوصا بتوع الحكومة.

أعتذر عن إختفاء المدونة عن الوجود لمدة إسبوع و ذلك بسبب ان الهارد بتاع الـ Server ضرب و المشكلة الاكبر إن نسخة الـ Backup اللى الـ server بيعملها كل يوم طلعت Corrupted و علشان تكمل ماكنش عندى أى نسخة Backup تانية من المدونة بما فى ذلك التدوينات!! يعنى من الآخر كل اللى فات رااااح
و بعد ما فقدت الأمل وجدت بالصدفة أن نسخة الـ Backup بتاع الـ Database سليمة :)))
يعنى الخساير إنحصرت فى الـ Theme بس هضطر أعملها من جديد أو أعمل واحدة جديدة.

أنتظروا المدير فى ثوبه الجديد :)

زى كل مرة :)  إن لم تكن قرأت الحلقتين الأولى و الثانية و الثالثة  يفضل قراءتهما أولاً لتتابع تسلسل الأحداث.

بدأت أدخل فى مرحلة من الإستقرار فى المكتب .. فالمحاسب قد أنهى الإجراءات من سجل تجارى و بطاقة ضريبية و التسجيل فى الغرفة التجارية و قد أتى موعد الإقرارات الضريبية فى شهر مارس 2006 و كثير من الناس نصحونى بأنه سهل و يمكننى أن أوفر تكاليف المحاسب و أكتبه و أقدمه بنفسى ( أخذ منى 250 جنيه لكتابته و تقديمه) و لكننى فضلت أن يقوم هو بهذه المهمة تجنبا للوقوع فى اى خطأ. و أحمد الله أننى أخذت هذا القرار…. إقرأ باقى التدوينة »

شركة صََرفت وقت و مجهود و فلوس علشان يعملوا برنامج و يبيعوة و يكسبوا منه…  و واحد تانى معقد نفسيا يتعب و يصرف وقت و مجهود و يمكن فلوس علشان يعمل كراك للبرنامج ده… و بعدين إحنا نجيب البرنامج و الكراك ببلاش و ندعى للراجل اللى عمل الكراك و يتحرق اللى عمل البرنامج!!

المسخرة فى الموضوع إن اشد الناس تديناً ( بما فيهم رجال الدين) لايجدون اى غضاضة فى إستخدام البرامج المنسوخة… مش حرام ولا حاجة… مع إنها سرقة علنى!! و يمكن دى من الحاجات القليلة جدا التى إتفق عليها الناس ضمنيا.

من المفروض أن أبدأ بإلقاء اللوم على شركات البرمجيات متهما إياهم بالإحتكار و المبالغة فى الأسعار إلخ إلخ .. على الأقل علشان انام و انا ضميرى مرتاح و ما يكونش عندى إحساس بالذنب لكن الضمير بيقول واحد عمل حاجة … من حقة يبيعها بالسعر اللى هو عايزه زى ما انا من حقى إنى أشتريها أو ما اشتريهاش.

 الحقيقة لقد قررت أن أبدأ بنفسى فى هذا الموضوع و أحاول على قدر الإمكان تقليل ما أقوم بسرقته :) و كلما توفر لدى بعض المال أقوم بشراء نسخة Windows مثلا لأحد الأجهزة. أيضا قررت التوقف عن إستخدال الـ MS Office فى أغلب الأجهزة و إستعنت بـ Open Office المجانى فى اغلب الاجهزة…

طبعا المشوار لسة طويل فأنا محتاج ثروة صغيرة لأقوم بشراء كل البرامج التى أستخدمها, و إن كنت اتمنى من الجهات الحكومية و الاهلية التى تساند المشاريع الصغيرة بالإضافة لشركات البرمجيات الكبرى ان يتعاونوا لدعم هذه البرامج لهذه الشريحة من أصحاب الأعمال الصغيرة و المتوسطة.

 إن لم تكن قرأت الحلقتين الأولى و الثانية يفضل قراءتهما أولاً.

الحقيقة إنى إستفدت من موضوع هيئة الإستثمار بأنى فتحت المكتب لمدة حوالى سنة بإستخدام أوراق هيئة لإستثمار بدون الخوف من بعبع الضرائب حيث أنه قيل لى أنه فى حالة رفض اللجنة إعطائى الإعفاء أو فى حالة قرارى إغلاق النشاط لن احاسب ضريبياً على هذه الفترة فكانت فرصة جيدة لتجربة المكتب.

و بعد هذه السنة قررت أن ابدأ فى إجراءات إغلاق النشاط و كانت هيئة الإستثمار قد إنتقلت للمقر الجديد الشيييك الفخيييم فى صلاح سالم و كان من حظى أن إجراءات الغغلاق تمت هناك.. المقر الجديد غاية فى الفخامة … جميع الموظفين يرتدون يونيفورم رسمى محترم جدا … بس للأسف العقليات هى هى … شبابيك مافيش موظفين قاعديين قدامها و ناس بتنادى و بتزعق و محدش فاهم حاجة… إقرأ باقى التدوينة »

 إن لم تكن قرأت الحلقة الأولى (البداية) يفضل قراءتها أولاً.

عندما ذهبت للمقر القديم لهيئة الإستثمار فى وسط البلد لم أصدق نفسى … معقول ؟؟ أنا فى هيئة حكومية ؟؟؟!

مكاتب فى منتهى الشياكة و موظفين لابسين يونيفورم و كاونتر إستقبال يرشدك .. و الحقيقة أهم ما لاحظت أنه يوجد قسم إسمه قسم المشورة على ما أتذكر و مهمة موظفى هذا القسم هو إرشاد المستثمرين و تزويدهم بالمعلومات إلخ

المهم… رحت قسم المشورة ده حوالى 6 مرات و كل مرة اجلس مع أحد الموظفين ليجيب على إستفساراتى و للاسف لم أحصل على الكثير من المعلومات لدرجة أننى كنت مش فاهم هو أنا اللى مشعارف أسال وللا هما اللى مش عارفين يجاوبوا ؟؟!! إقرأ باقى التدوينة »

 منذ  حوالى سنة إشتريت حقيبة لابتوب Targus و الحقيقة كانت غالية شوية لأنها جلد طبيعى.. و منذ فترة قصيرة لاحظت أن القطعة الجلدية التى تربط اليد بالحقيبة بدات تنقطع!! على الرغم من انها لم تكن مشكلة كبيرة حيث أن تحت هذه القطعة الجلدية هناك طبقة من القماش القوى تربط اليد بالحقيبة و هذه القطعة الجلدية ليست إلا غطاء فقد تضايقت جدا …. معقول شنطة بالثمن ده ما تكملش سنة؟!!!  إقرأ باقى التدوينة »

بعد ما تخرجت من الكلية بحوالى سنة و نصف اخذت القرار الجرئ …. هافتح المشروع اللى بتمناه،

فكرت فى البداية أن أعطى العيش لخبازه و أستعين بمحاسب قانونى لمساعدتى فى الإجراءات و بالفعل قمت بمقابلة أكثر من واحد و كانت السمة الغالبة على كل من قابلتهم أنه عندما تسألة سؤال يعطيك نصف معلومة او يتوهك و لا يرد على السؤال و طبعا أهم حاجة أنه يحسسك أنه من غيره ممكن تروح فى داهية و تتورط إلخ… بإختصار لم أسترح لأى منهم و قررت أن اقوم بالإجراءات بنفسى!!  إقرأ باقى التدوينة »

باموت من الضحك لما باشوف مسؤل كبير ييجى فى التليفزيون أو فى الجورنال و بصرح بأن المشاريع الصغيرة هى الأمل فى إنقاذ الإقتصاد المصرى و حل مشكلة البطالة إلخ و لذلك نقوم الحكومة بدعم هذه المشاريع بمساعدة الشباب و صغار المستثمرين إلخ إلخ…

النصف الاول من التصريح صح جدا و مش عندنا بس… قرأت مره فى النيوزويك أن المشاريع الصغيرة هى الامل من إنقاذ العالم بأسره من الكساد العالمى القادم و لكن النصف الثانى الخاص بالدعم … أنا شخصيا ما شفتوش … لو حد شافه يا جماعة ياريت يقول لى!!

البداية دى كانت مهمة لأنى شخصيا لما فكرت أفتح مشروعى الخاص كنت متفائل جدا و مصدق كلام الحكومة كلله و لكن بعد التجربة طلعت على نياتى :)

هل معنى كلامى إن الواحد ما يفكرش يفتح بيزنس خاص بيه؟ طبعا لا… بدليل إنى غير نادم على أنى صاحب عمل و لو الزمن عاد بى لفتحت المكتب برضه و لكن اكيد كنت هاوفر على نفسى كثير من الوقت الذى ضاع و المشاكل التى حدثت بسبب جهلى بأمور صغيرة و لكن هامة جدا كان يجب مراعاتها و لكن للأسف لم اجد من ينصحنى.