أغسطس 24 2012

الكرسى أبو ٨٠ جنيه!

الدليل المادى

الدليل المادى فى التسويق

ذهبت لمقابلة مسئول فى أحد شركات الشحن المحلية الشهيرة للمحاولة للوصول لإتفاق جيد على أسعار الشحن لموقع تجارة إلكترونية خاص بأحد عملائى. بالرغم من وجود الشركة فى موقع جيد بمصر الجديدة لكنك فى الغالب لن تلحظ اللافتة الصغيرة الغير واضح المكتوب عليها بسبب عوامل الزمن شكلها كده من ساعة ما فتحوا الشركة من ٣٠ سنة وللا حاجة 🙂

صعدت للدور الموجود به المسؤل فوجدت الشركة ليست أفضل حالا من اللافته القديمة. مش مهم.. أنا بس عايز ديل كويس و خلاص… دخلت للمسؤل عرفته بنفسى و أوضحتله طلبى فرفض يعطيني أي أسعار قبل ما أبعت له السجل التجاري و البطاقة الضريبية بالرغم أنني أوضحت له إني بس عايز معلومات مش أكتر و لما نمضي العقد ها أبعتله اللي هو عايزه! بس برضو أصر! المهم بعد ما إطمئن من أننا شركة مش فرد أعطاني ورقة فىها اسعار و بنظرة سريعة لاحظت أنها أغلى من أسعار شركة أخرى عالمية بالفعل متعاقد معها. و لما أوضحت له إن الأسعار غالية و إننى كنت منتوقع أسعار أرخص من الشركه العالمية الأخرى قاللى مش هايننفع نتكلم في تخفيض غير بعد ما نتعامل فتره و بعدها نقيم حجم تعاملاتك و على أساسه نشوف هانديلك تخفيض وللا لأ، و الأغرب أنه إستنكر بشده فكرة إن أسعارهم أرخص و إدعى أن ما يميزهم ليس رخص الأسعار بل هو جودة الخدمة و عراقة الشركة التي لا تضاهيها الشركة العالمية التي قارنته بها!!

يمكن يكون عنده حق… بس… فى مشكلة صغيرة.. أنا كنت بأسمع الكلام الجامد دا و أنا قاعد علي كرسي تمنه لا يزيد عن ٨٠ جنيه أتأمل الجدران التى لم يزورها النقاش من عشرات السنين و أشعر بالحر بسبب عدم وجود تكييف. و أتذكر كيف رفض موظفيه إعطاء معلومات لسكرتيرتى بالهاتف ولا البريد الالكتروني و أصروا على مقابلة و كمان في مقرهم مش في مقر شركتى… و فى نفس الوقت أتذكر الشركة الأخرى العالمية التى إتصل مسؤل مبيعاتها بعد ساعات قليلة من إتصالي بالكول سنتر و إعطاؤه كل المعلومات التى رغبتها بالهاتف و قدومه لمقر شركتى ثانى يوم و مع كل الأوراق و التفاصيل و العقود بل أتذكر قيامه بعمل تخفيض آخر في الأسعار قبل إمضاء العقد بدقائق… و كل دا بيدور فى دماغى تفتكروا هاصدق حاجة من الخطبة العصماء اللي كنت باسمعها؟؟!

طبعا لأ و مليون لأ!!!

ليه مش ممكن أصدقة؟؟ ببساطة علشان اللى بيتكلم عليه غير اللى أنا شايفه بعيني خالص و هو دا اللى إسمه Physical Evidence الدليل المادى و هو العنصر السابع من المزيج التسويقى الخاص بالخدمات 7Ps Marketing Mix حيث أن الخدمات كما نعرف غير ملموسة مما يصعب على المسوق مهمته إلى حد كبير عند تسويق على عكس المنتجات. لذلك تميل الزبائن إلى الاعتماد على الدلائل المادية لمساعدتهم على تقييم الخدمة قبل شرائها. ولذلك يركز مدير التسويق الناجح عي الأدلة المادية عند تسويق الخدمات و التى يجب أن تكون متجانسة تماما مع الرسائل التسويقية التى تبثها الشركة عبر القنوات المختلف] و كثيرا من الشركات و مؤسسات الخدمات تعتمد مقوة على الأدلة المادية مثل البنوك و الفنادق و شركات التأمين و بعيدا عن التسويق طبعا أشطر ناس بيجيدوا إستخدام الأدلة المادية.. النصابين 🙂

أمثلة للأدلة المادية:

  • موقع الشركة
  • الديكورات و آثاث المكتب
  • المواد الدعائية المختلفة (كروت شخصية، بروشور، فلاير، إلخ)
  • موقع الشركة على الإنترنت
  • شكل التغليف Packaging
  • و العديد من الأدلة المادية الأخرى…

الإنطباع اللى أخدته عن الشركة دى إنها شركة تعبانه و بالتالى لازم تكون أسعارها رخيصة و بالتالى كل الكلام اللى المسؤل قاله لى عقلى رفض تصديقه لأنه ببساطة غير معزز بأي أدله مادية. مع إنه بالمناسبة – و للأسف – كلام حقيقى إلا حد كبير حيث عرفت فيما بعد من أحد أصدقائي الذين جربوهم أن خدماتهم جيدة إلى حد كبير.

من ساعة ما كنت هناك باسأل نفسى.. يا تري ضيعوا كام عميل بسبب إهمالهم لأبسط أسس تسويق الخدمات؟!

التعليقات

Mahmoud Ibrahem 24-08-2012, 01:51

مدام شركة قديمة ممكن يبقي معتمد علي سمعته في السوق مثلا؟

رد
مدونة المدير 26-08-2012, 13:28

دا فعلا صحيح بس سمعته دي مالهاش لازمة لعميل غير فى ال word of mouth بس .. غير كدا ولا الهوا 🙂

رد
Hemmat Mohammad 25-08-2012, 18:30

جميل

محتاجين من دا كتييييييييير
واحلى حاجة انه مثال مع معلومات علمية

جزاك الله خيرا

رد
Mohamad Mohamed 25-08-2012, 19:23

هما اللى خسرانين

رد
Mahmoud Saad 26-08-2012, 13:22

اولي اساسيات المنهج العلمي للتعامل في التسوق

رد
Fathy Kandel 27-08-2012, 09:18

ياريت مصر تعمل حاجة ماهى الصين بتعمل كل حا جه وارخص حاجة

رد
مين انا 04-11-2012, 20:24

هاى انا حميدو من دمياط على فاكره احنه عندنه فى دمياط فى حاجات ارخص من الصين بكتير اوى وانا عندى معرض وورشه كمان والى عايز يعمل ايه حاجه انا تحت امره نوم سفره انتريهات كل حاجه فى الخشب انا بعمله عندى

رد
Mohamed Talaat Mahrous 08-11-2012, 23:56

هلا حميدو
ممكن لو سمجت تضيفى على الفيس بوك عشان اشوف الحاجات اللى عملتها ابل كده واعرف رنج الاسعار كام
انا كنت ناوى أجيب من الصين بسي خلينا نجرب نشوف المصرى

رد
العناصر السبعة لتصميم موقع شركتك على الإنترنت | مدونة المدير 26-12-2012, 13:08

[…] أهمية أن يكون التصميم و البناء محكم حيث يعتبر موقعك الدليل المادى الذى يراه العميل و يصدر حكمة على شركتك أو منتجك أو […]

رد

اترك رد


تابع المدير

 تابع خلاصات المدير

 

 

Google+المدير

أقرأ حاليا..

المدير على بريدك

أدخل بريدك الإلكترونى لتصلك التدوينات الجديدة

Delivered by FeedBurner